Каноны молебныя мученику Уару и преподобному отцу нашему Паисию Великому.

Боже, милостив буди мне грешному (поклон).

Создавый мя, Господи, и помилуй мя (поклон).

Без числа согреших, Господи, помилуй и прости мя грешнаго (поклон).

Достойно есть, яко воистину блажити Тя Богородице, Присноблаженную и Пренепорочную, и Матерь Бога нашего, Честнейшую херувим, и Славнейшую воистину серафим, без истления Бога Слова рождьшую, сущую Богородицу Тя величаем(земной поклон).

Слава Отцу и Сыну и Святому Духу (поклон)

И ныне и присно и во веки веком, аминь (поклон).

Господи помилуй, Господи помилуй, Господи благослови (поклон).

Господи Исусе Христе Сыне Божии, молитв ради Пречистыя Твоея Матере, силою Честнаго и Животворящаго Креста, и святаго ангела хранителя моего, и всех ради святых, помилуй и спаси мя грешнаго, яко Благ и Человеколюбец, аминь (поклон земной, без крестнаго знамения).

За молитв святых отец наших, Господи Исусе Христе, Сыне Божии, помилуй нас. Аминь.

Святыи Боже, Святыи Крепкии, Святыи Безсмертныи помилуй нас. (Три раза с поклонами).

Слава Отцу и Сыну и Святому Духу, и ныне и присно и во веки веком, аминь.

Пресвятая Троице помилуй нас, Господи очисти грехи наша, Владыко прости беззакония наша, Святыи посети и исцели немощи наша, имене Твоего ради. Господи помилуй (трижды).

Слава Отцу и Сыну и Святому Духу, и ныне и присно и во веки веком, аминь.

Отче наш, иже еси на Небесех, да святится имя Твое, да приидет Царствие Твое, да будет воля Твоя, яко на Небеси и на земли. Хлеб наш насущный даждь нам днесь, и остави нам долги наша, яко же и мы оставляем должником нашим. И не введи нас во искушение, но избави нас от лукаваго.

Господи Исусе Христе, Сыне Божии, помилуй нас. Аминь.

Господи помилуй (12 раз).

Слава Отцу и Сыну и Святому Духу, и ныне и присно и во веки веком, аминь.

Приидите поклонимся Цареви нашему Богу (поклон).

Приидите поклонимся Христу Цареви и Богу нашему

(поклон).

Приидите поклонимся и припадем к Самому Господу Исусу Христу Цареви и Богу нашему (поклон).

Псалом 142. Господи услыши молитву мою, внуши моление мое во истине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живыи, яко погна враг душу мою, и смирил есть в земли живот мой. Посадил мя есть в темных, яко мертвыя веку. И уны во мне дух мой, во мне смутися сердце мое. Помянух дни древния, поучихся во всех делех Твоих, и в делех руку Твоею поучахся. Воздех к Тебе руце мои, душа моя яко земля безводная Тебе. Скоро услыши мя Господи, исчезе дух мой. Не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах. Скажи мне Господи путь в онь же пойду, яко к Тебе взях душу мою. Изми мя от враг моих, Господи к Тебе прибегох. Научи мя творити волю Твою, яко Ты еси Бог мой. Дух Твой благии наставит мя на землю праву. Имене Твоего ради, Господи живиши мя, правдою Твоею изведеши от печали душу мою, и милостию Твоею потребиши враги моя. И погубиши вся стужающыя души моей, яко аз раб Твои есмь.

Слава Отцу и Сыну и Святому Духу, и ныне и присно и во веки веком. Аминь. Аллилуия, аллилуия, слава Тебе Боже (три раза с поклонами). Господи помйлуи (12 раз).

Слава Отцу и Сыну и Святому Духу, и ныне и присно и во веки веком, аминь.

Глас 4.

Бог Господь и явися нам, благословен грядыи во имя Господне.

Стих 1-й. Исповедайтеся Господеви яко Благ, яко в век милость Его.

Стих 2-й. Обышедше обыдоша мя и именем Господним противляхся им.

Стих 3-й. Не умру но жив буду, и повем дела Господня.

Стих 4-й. Камень его же небрегоша зиждущии, сей бысть во главу углу, от Господа бысть сей, и есть дивна во очию нашею.

После каждого стиха глаголем: Бог Господь и явися нам, благословен грядыи во имя Господне.

Тропарь, глас 4-й

Мученик Твой Господи Уар, во страдании своем венец прият нетленный от Тебе Бога нашего. Имея бо крепость Твою непобедимую, мучащих упраздни, и сокруши бесом немощная шатания. Того молитвами Христе Боже спаси душа наша.

Ин тропарь, глас 4-й Воиньством святых страстотерпец страждущих законне, зря онех, показал еси мужески крепость свою. И устремився на страсть волею, и умрети вожделе за Христа. Иже приял еси почесть победы твоего страдания Уаре, моли спастися душам нашим.

Слава. Тропарь, глас 2. Божественною любовию от юности распалаемь преподобне, вся красная, яже в мире возненавиде, Христа единаго возлюбил еси. Сего ради в пустыню вселися, идеже сподобися Божественнаго посещения, Его же неудобь зрети и ангельскима очима, паде поклонися; великии же Дародатель, яко Человеколюбец, рече к тебе: не ужасайся, возлюбленный Мой, дела твоя угодна Мне. Се даю тебе дар: о коем либо грешнике помолишися, отпустятся ему греси. Ты же в чистоте сердца твоего возгореся, прием воду и прикоснуся Неприкосновенному, умы нозе Его, и воду пив, даром чюдес обогатися: грешники от муки молитвою своею избавляти, болящия исцеляти, О! преподобне отче Паисие, и бесов от человек отгоняти, ибо от сих грешников первыи есмь аз. Молю тя, да умолиши, Иже тебе обетова, да даст ми время покаяния, и простит мое согрешение, яко Благии и Человеколюбец, да со всеми и аз воспою Ему: Аллилуия.

И ныне. Богородичен глас 2. Вся паче смысла, вся преславная Твоя Богородице таинства, чистотою запечатлена, и девством хранима, Мати разумеся неложна, Бога рождши Иистиннаго, Того моли спастися душам нашим.

Псалом 50. Помилуй мя Боже по велицей милости Твоей, и по множеству щедрот Твоих, очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю и грех мой предо мною есть выну. Тебе единому согреших, и лукавое пред Тобою сотворих. Яко да оправдишися в словесех Своих, и победиши внегда судити. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне Боже, и дух прав обнови во утробе моей. Не отверзи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычным утверди мя. Научю беззаконныя путем Твоим, и нечестивии к Тебе обратятся. Избави мя от кровей Боже, Боже спасения моего, возрадуется язык мои правде Твоей, Господи устне мои отверзеши, и уста моя возвестят хвалу Твою. Яко аще бы восхотел жертвы, дал бых убо, всесожжения не благоволиши. Жертва Богу дух сокрушен, сердце сокрушено и смирено Бог не уничижит. Ублажи Господи благоволением Твоим Сиона, и да созиждутся стены иеросалимския. Тогда благоволиши жертву правды, возношение и всесожегаемая. Тогда возложат на олтарь Твой тельца.

Господи Исусе Христе, Сыне Божии, помилуй нас. Аминь.

КАНОН, глас 6-й

Песнь 1. Ирмос. Яко по суху ходив Израиль по бездне стопами, гонителя фараона видя потопляема, Богу победную песнь поя вопияше.

Запев: Святыи мучениче Уаре, моли Бога о нас (поклон).

Явися на высоте Христовы Церкви святе, яко солнце светлое. Облистанием просвещая своих борении блаженне земная исполнения.

Запев. Святыи мучениче Уаре, моли Бога о нас.

Божественыя любве всеблаженне объят сладким рачением, отвержеся себе, ко всякои муце плотьскои устремися, крепко подвизався.

Запев. Святыи мучениче Уаре, моли Бога о нас.

Смыслено божественых подвижник юзами связав себе страстотерпче. И лестныя разори юзы, крепким терпением многих мук.

Запев. Пресвятая Госпоже Богородице, спаси нас.

Пресущественое Слово, в Твоем чреве паче слова вселися, и рождься боголепно, мученическия лики Чистая приял есть. С ними же песнословим Тя.

Запев: Преподобне отче Паисие Великии, моли Бога о нас (поклон).

Иже вся умудряющему Богу молися, преподобне отче о рабе своем, да отверзет ми устне недостойнии, и двигнет ми язык недоуменныи. Тесноту же и худогласие отче разверзи благодатию, иже в тебе Святаго Духа, к пению чюдес твоих.

Запев. Преподобне отче Паисие Великии, моли Бога о нас.

Начну убо достохвальное и душеполезное житие твое от младенства. Иже древле Египет великаго во пророцех произнесе Моисея, иже к Богу присвоением и великими чюдесы прославися. Тако и ныне вторицею прославлен показася Египет, тебе ради, отче Паисие, честным именем твоим и многими добродетельми обогатися, еже дарова тебе Господь, Его же моли, да спасет душа наша.

Слава. В Царство Небесное вшед узким путем и прискорбным по заповеди Владыки своего Христа, преподобие отче Паисие, широкии и пространныи путь возненавидев, распространьшиися мрак ума моего отжени, да возмогу малое сие моление принести в пречестную память твою.

И ныне. Богородичен. Дух сокрушен подаждь ми Благая, смиренно сердце, уму же чистоту и житию исправление и прегрешением оставление.

Катавасия: Избави от бед рабы своя, святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон).

Катавасия: Избави от муки вечныя усопшаго(их) раб(а) своего(их) (имя рек), преподобне отче Паисие Великии, яко вси по Бозе к тебе прибегаем, ты бо молиши о нас Христа Бога нашего (поклон).

Господи помилуй (трижды с поклонами).

Песнь 3. Ирмос. Несть свят яко же Ты Господи Боже мой, вознесый рог верных си Блаже, и утверждь их на камени исповедания Ти.

Запев. Святыи мучениче Уаре, моли Бога о нас.

Вниде разумом крепким в мужественныя подвиги, утверждься надеждею будущих благ, и мученик Христовех премудрыми блаженне поучении.

Запев. Святыи мучениче Уаре, моли Бога о нас.

Воиньство святых страстотерпец, страждущих законне зря, онех, показал еси мужескую крепость, примешался многообразным Уаре мукам.

Запев. Святыи мучениче Уаре, моли Бога о нас.

В полце священнем Уаре яко доблии воин обретеся. Иссек множество мужеством меча мудре ратных, победами прославляем.

Запев. Пресвятая Госпоже Богородице, спаси нас.

Дево Мати Божия, моего уныния глубокую тму, и облаки страстей, просвещением еже в Тебе благодати молюся отжени.

Запев. Преподобне отче Паисие Великии, моли Бога о нас.

Каменю веры Петру апостолу уподобился сей, распятся мирови во всей жизни своей преподобне Паисие, и нозе свои невозвратно к небесному шествию управил еси, и горняго Иеросалима достигл, со святыми предстоя Святеи Троице, моли о мне единаго Благаго Человеколюбца.

Запев. Преподобне отче Паисие Великии, моли Бога о нас.

Благочестиваго корени пресветлая отрасль, тебе избра Господь, ангел рече матери твоей, сей Богу угоден. Ты же от младенства крест свой взем, невозвратным путем Тому последова, и возрасташе леты и разумом купно и благодатию Божиею. Моли дати ми отпущение грехов.

Слава. О, Владыко Господи Исусе Христе, кто не удивится Твоему человеколюбию, егда прииде желание преподобному иноческо житие получити к деланию заповедей Твоих, Твоею благодатию яко агнец непорочен изведеся в пустыню, и достигл словесных овец, и введеся к пастырю блаженному Памве, и облечеся во иноческии образ, в нем же утверди и мене Господи, молитвами преподобнаго Паисия, к деланию заповедей Твоих.

И ныне. Богородичен. Лютых мя мук, и тмы кромешный и геенны, Твоими молитвами свободи Дево, имаши бо волю и силу, Господа рождшая единаго Преблагаго.

Господи помилуй (трижды с поклонами).

Кондак, глас 2-й. Житейских молв оставль, безмолвное житие возлюбил еси, Крестителю подобяся всеми образы, с ним же тя почитаем, отче отцем Паисие.

Икос. Христов глас услышав, шествовал еси во след Того заповедей, наг жития быв, отверг попечения и вся стяжания и имения, и братии своих и любве матере, богоносе Паисие, един в пустынях Богови беседуя разумом, дарования приял еси, еже ми посли в песнех поющему, отцем начальниче Паисие.

Седален, глас 1-й.Страсти честных видев мученик, и тех лобзав узы, на высоту востече свидетельства пречюдне. На древе бо повешен, раны претерпел еси, дондеже в руце Господни дух предал еси.

Седален, глас 2-й. Слава. Душу связав любовию Христовою, земная возненавидев вся мудре, водворился еси, отче преподобне, в пустынях и горах, разумнаго древа вкуш славне, ангельски просиял еси. Тем же и мрак прошед плоти своея, тму отгнал еси бесов Паисие, инокующым первый, моли Христа Бога, грехов оставление подати, чтущым любовию святую память твою.

И ныне, глас тойже. Скорый покров и помощь и милость покажи на рабе Своем Чистая, и волны укроти суетных помышлении, и падшую ми душу возстави Богородице, вем бо вем, яко можеши елико хощеши.

Песнь 4. Ирмос. Услышав же пророк приход Твой Господи, и убояся, яко хощеши от Девы родитися, и человеком явитися, и глаголаше услышах слух Твой и убояхся, слава силе Твоей.

Запев. Святыи мучениче Уаре, моли Бога о нас.

Святыми ти язвами удобряемь, прекрасен явися. И Богови Уаре возлюблен венчавшему твой верх, достославне.

Запев. Святыи мучениче Уаре, моли Бога о нас.

На кресте славне растязаемь, и на земли простираемь, лютыя болезни претерпел еси. Тем неболезненыи живот наследова веселяся.

Запев. Святыи мучениче Уаре, моли Бога о нас.

Законно видяще божествении мученицы страждуща тя блаженне, терпения словесы укрепляху. С ними же страсти долгия совершив, ублажился еси.

Запев. Святыи мучениче Уаре, моли Бога о нас.

Хвалами венчаем Божия мученики, их же венча благодать божественая, божествеными увязении. Низложывших вражия высокая мудрования.

Запев. Пресвятая Госпоже Богородице, спаси нас.

От тины страстей Владычице возведи, и от страстных помышлении, чюжа творящих мя Бога единаго чистаго. Да верою ублажаю Тя.

Запев. Преподобне отче Паисие Великии, моли Бога о нас.

Законострадальческое житие от мягких ногтей восприим богомудре Паисие, даже до конца пребыл еси, яко божествен доблественник венец приял еси победы от всех Царствующаго, молитвами своими избавляти от муки грешники, от них же первыи есмь аз, не забуди мене.

Запев. Преподобне отче Паисие Великии, моли Бога о нас.

Имуще молитвенника крепка блаженне Паисие, и обещника печальным, предстателя и поборника и ходатая благочестна, от всяких спасаемся бед, напастей и обстояний.

Слава.Велию судеб бездну имеяи, Той тебе рече: се бо даю ти дар, да все еже просиши от Отца Моего во имя Мое, дастся тебе, о коем либо грешнике помолишися, оставятся греси того: сего ради припадаю ти отче Паисие, имея бездну согрешении, да отпустит твоими молитвами иже тебе обетова, яко Благ и Человеколюбец.

И ныне. Богородичен. Глагол провещай, егда право имам судитися, Богородительнице к Своему Сыну Пренепорочная, да обрящу Тя тогда прибежище и заступление державнейшее, и мук всех избавляющи.

Господи помилуй (трижды с поклонами).

Песнь 5. Ирмос. Божиим светом Ти Блаже утренюющих Ти душа любовию просвети молюся, Тя ведети Слово Божие истиннаго Бога, от мрака греховного изимающа.

Запев. Святыи мучениче Уаре, моли Бога о нас.

Укрепляешися манием божественым, и неослабная строгания терпиши доблим смыслом Уаре, расторгая гордаго сердце злобы содетеля.

Запев. Святыи мучениче Уаре, моли Бога о нас.

Славный мученик, видя отпадающия своя плоти радовашеся. Вечнующее ума светлости, и божественая воздания предпрозирая.

Запев. Святыи мучениче Уаре, моли Бога о нас. Пою Тя Господи Боже и славословлю и поклоняюся (поклон). Благих сподобляя мя, уготованых Тебе возлюбльшим, мученик в страдании тепле взываше.

Запев. Пресвятая Госпоже Богородице спаси нас.

Явльшися Херувим и Серафим яко воистину святейши Пренепорочная. Всех верно Тя ныне освящающих освяти, и спаси ходатайством Ти.

Запев. Преподобне отче Паисие Великии, моли Бога о нас.

Постом удручая тело свое отче Паисие, иногда по причащении Тела и Крови Христовы, яко ангел седмьдесят дней без пищи телесныя пребывая, божественную державу неизреченную имущи, и возмогши в тебе животную содержати силу благодатию Своею, паче пищнаго укрепления, слава державе Твоей Господи.

Запев. Преподобне отче Паисие Великии, моли Бога о нас.

Яко Иоанн Креститель узким и прискорбным путем ходити произволил еси. Но той на Иордане узрев Зиждителя своего, устрашися и вопияше: не смею приступити сено огню. Ты же, отче Паисие, в пустыни иногда явльшагося Господа, не могии пречистаго лица Его зрети, паде трепетом одержимь. Он же ти рече, не устрашайся, сию пустыню наполню постниками тебе. С ними же молим отче, не забуди нас молитвенник твоих помилованным быти.

Слава. Аз бо в начале моя пред Тобою зрю согрешения, и о моих беззакониих молю Твое милосердие, да простиши и покрыеши благоутробием Твоим множество грехов моих, и даждь ми прочее жизни сея время безгрешно проводити. Да удобь на спасения стезю потек, безпреткновенно к доброму концу достигну Твоею помощию, кроме бо Твоей помощи и наставления ничто же благо совершити, и милость у Тебе получити кто может.

И ныне. Богородичен.

Рабское приношу Ти моление неразумный аз, и к Твоему прибегаю благоутробному милосердию, не отврати мене Чистая посрамлена.

Господи помилуй (трижды с поклонами).

Песнь 6. Ирмос. Житейскаго моря воздвизаема зря напастей бурею, в тихое пристанище притек вопию Ти: возведи из тля живот мой Многомилостиве.

Запев. Святыи мучениче Уаре, моли Бога о нас.

Глагол небрегл еси беззаконнаго врага. И пламы претерпел еси нестерпимых болезней терпеливно, многострадалне Уаре, молебниче о хвалящих тя.

Запев. Святыи мучениче Уаре, моли Бога о нас.

Непресташе мучитель безумный ранами немилостивно сдробляя тя, дондеже в руце Божии святую ти душу предал еси, добротами просвещьшюся подвиг твоих.

Запев. Святый мучениче Уаре, моли Бога о нас.

Возвижеся подобяся на древе Христу, и на том вися твою душу предал еси Богу, тя венчавающу страстотерпче, законно доблествовавша.

Запев. Пресвятая Госпоже Богородице спаси нас.

Окорми Владычице в пучине лютых обуреваемую всегда убогую душу мою, и к тихому пристанищу направи, несуменном разумом Тя ублажающю.

Запев. Преподобне отче Паисие Великии, моли Бога о нас.

Бездушная тварь Иордан своего Творца устыдеся, вопияше: не могу Безгрешнаго омыти. Святыи же виде Господа, прием воду, прикоснуся Неприкосновенному, умы нозе Его. И пив воду, и прия дар целити недуги и прогонити от человек бесы. Сего ради и мы припадаем ти отче, молитвами твоими помилуй нас от всяких бесовских наведении.

Запев. Преподобне отче Паисие Великии, моли Бога о нас.

По славе Господа нашего Исуса Христа, обретохом тя отче Паисие великое прибежище, и заступника и тепла молитвенника о гресех наших. Яко же первее инока преставльшася, и христианства отчуждившася и во глубину адову пагубным безверием низведеся, и егда ощутився притече к тебе, да умолиши Всемилостиваго. Щедрыи же Господь явися тебе и глагола: о, угодниче мои, добро есть Моей любви подобяся, печешися о грешных, изволяяи муки приити за их избавление.

Запев. Преподобне отче Паисие Великии, моли Бога о нас.

Принесеся молитва твоя и слезы к Богу, яко благовонный фимиам, и жертва непорочна и благоприятна, и мене не забуди ходатайством твоим ко Пресвятей Богородице, слезы умиления даси ми, омый грехов моих бездну, избави мя от смертныя глубины. И не надеющымся подаждь велию милость, и прости им согрешения.

Слава. Весь недумением одержимь есмь, егда прииму во уме той час страшный испытания Судии и Бога, и плачуся и сетую и рыдаю, поминая бездну зол моих. Тем же спаси Человеколюбче молитвами Твоего угодника преподобнаго Паисия, и избави мя муки, яко благоутробен.

И ныне. Богородичен. От сердца стенания приношаю Ти Пренепорочная, Твое прося благопребытное заступление. Помилуй всестрастную ми душу, умилосердися Мати многомилостиваго Бога, избавити мя Суда и езера огненаго.

Господи помилуй (трижды с поклонами).

Слава, и ныне.

Кондак, глас 4-й. Христу последуя мучениче Уаре Того испив чашу, и мучения венцем увязеся. И со ангелы ликовствуя, моли непрестанно за душа наша.

Икос. Вспомяни наша глаголы светлыи жителю небесный, Христов славный великомучениче Уаре вечному покою тезоимените, и великими ти страдании непреходимое и светлое покоище приобретыи. От непреходимыя и томления непрестаннаго и нужды, потщися богоприятными ти молитвами избавити рабы умиленыя, за них же молим тя предстояще, и во усердии взывающе, исполни наше прошение святе, и Христа Бога моли непрестанно за душа наша.

Песнь 7. Хладодательну убо пещь сотвори ангел преподобным детем, халдея же опали велением Божиим. Мучителя увеща вопити: благословен Бог отец наших.

Запев. Святыи мучениче Уаре, моли Бога о нас.

Просвещена тя подвиг приложением, предобрая Клеопатра Уаре, скутала есть обретши славу тобою веры достоину яве. Юже показа тепле в твое скончание.

Запев. Святыи мучениче Уаре, моли Бога о нас.

Изливающи на тя слезы, и миром честным помазающи, сокрывает тя под землею всечестная жена, погребшаго прелесть лукавую, и гробными блистании просвещающа нас.

Запев. Святыи мучениче Уаре, моли Бога о нас.

Не престаше преподобне угождающи тебе Христову угоднику приснопамятная, дондеже явися ходатай ей мудре Царству Небесному. Ему же сподобися тобою с возлюбленым своим.

Запев. Пресвятая Госпоже Богородице спаси нас.

Сокрушена мя безчислеными согрешении Дево, ходатайством Ти обнови, уврачюющи ми душу, и слово подающи вопити: благословена яже Бога плотию порождьши.

Запев. Преподобне отче Паисие Великии, моли Бога о нас.

Многих грехов исполнен аз, и твоя молитва яко кадило благовонно исправися отче. Бездну грехов моих потреби, и буяющее море злаго жития изсуши, и напоение гневное отжени, и целомудренный ум молитвами своими утверди отче Паисие.

Запев. Преподобне отче Паисие Великии, моли Бога о нас.

Наставника тя и молитвенника тепла имущи, и скораго помощника, яко стену тверду и забрало недвижимо и воеводу крепка и непобедима молим тя, не забуди молитвенник твоих, избавляя от всякия печали и навет вражиих.

Запев. Преподобне отче Паисие Великии, моли Бога о нас.

О, чюдо велие, во един от дней седящу ти отче Паисие в пещере, бысть ти глас глаголяи: мир тебе, возлюбленному Моему угоднику, ты же возстав со страхом и трепетом одержим, паде поклонися и рече: се раб Твой Господи. Сего ради молим тя, моли Человеколюбца, да спасет душа наша.

Слава. Даждь ми Христе разум и терпение, еже не осуждати согрешающих с кичением фарисейским, но яко мытарево покаяние приими, и яко блуднаго сына Боже вечери Твоей достойна мя яви, молитвами преподобнаго Паисия, и грехов прощение ми даруй.

И ныне. Богородичен. Возникни, о, страстная душе, возстани окаянная, бий из глубины в перси, и испусти слез источники, да тя помилует окаянную милосердая Мати Христа Бога.

Господи помилуй (трижды с поклонами).

Песнь 8.Из пламене святым росу источи, а праведнаго жертву и воду попали, вся бо твориши Христе елика хощеши, тем тя превозносим Господа во веки.

Запев. Святыи мучениче Уаре, моли Бога о нас.

Матерьских послушав мучениче молеб, небесному воиньству светло воиньствуя. Отрока честнаго не отвержена показал благославна, неизреченным милосердием.

Запев. Святыи мучениче Уаре, моли Бога о нас.

От Египта тя богатьство, яко многоценное принесе мучениче, разбогатящи многоценными дарми Клеопатра целении всю Палестину, любовию тя почитающю.

Запев. Святыи мучениче Уаре, моли Бога о нас.

Веселяся подвиги своя совершил еси, воине доблии Вседержителя, и яко победитель от Него венчася, Уаре всеблаженне мучеником великая славо.

Запев. Пресвятая Госпоже Богородице спаси нас.

Грехи прилагаю на согрешения, и будущаго не боюся Страшнаго Суда. Победи Чистая души моей ослепление, и молбою Твоею возвративши мя спаси.

Запев. Преподобне отче Паисие Великии, моли Бога о нас.

Благодарно приносимое тебе пение сие не презри, отче Паисие, но паче приими и радости духовныя исполни, да без закоснения поклонюся (поклон) твоему образу, идеже есть написан, исцеления всем подавающ.

Запев. Преподобне отче Паисие Великии, моли Бога о нас.

Всепреподобному житию поревновав, богоугодных отец, иже от века поживших отче Паисие, во смирении и постничестве Христа ради, всю жизнь свою мученически скончал еси, и от бесов нападения много претерпел еси, и сих победив. Сего ради молю тя отче, буйство, ярость и небрежение молитвами твоими отрини от мене.

Запев. Преподобне отче Паисие Великии, моли Бога о нас.

Владыко Христе Боже Всещедрыи, ими же веси судьбами даждь ми ненавидети деянии лукаваго, Ты бо еси Бог наш рекии, просите и приимете. Даждь любовь от всея души моей, молитвами преподобнаго отца Паисия, творити волю Твою спасительную.

Слава. Молютися, на мне грешнем долготерпи Владыко, и не посецы мене яко неплодное древо посечением смертным во огнь отсылая, но плодоносна мя сотвори молитвами преподобнаго умолен бывая, время покаяния ми даждь, яко Человеколюбец.

И ныне. Богородичен. Струи низпосли слез и стенания от души, сотвори ми Чистая, внегда припадати к Твоему покрову, яко да обрящу разрешение грехов моих, Твоею молитвою.

Господи помилуй (трижды с поклонами).

Песнь 9. Ирмос. Бога человеком неудобь видети, Нань же не смеют чини ангельскии зрети. Тобою бо Пречистая явися нам Слово воплощено. Его же величающе с небесными вои, Тя величаем.

Запев с поклоном. Святыи мучениче Уаре, моли Бога о нас.

Крепость низложил еси ратоборца, в Божию яве силу оболкся страдалче доблии Уаре. Тем тя хвалим, исцеления неоскудно от твоих мощей верно почерпающе.

Запев. Святыи мучениче Уаре, моли Бога о нас.

Яко свет яко утро, яко великое солнце в земленыя простреся память твоя концы. Светоносными просвещающи сияньми твоих честных подвиг всех прехвалне. И мрак сердечный отгонящи.

Запев. Святыи мучениче Уаре, моли Бога о нас.

С тобою сияюща видевши славою многою своего сына чадолюбивая, всех Бога величаше. Тебе же прилежно мучениче славит велика заступника, явствено обогатившися.

Запев. Святыи мучениче Уаре, моли Бога о нас.

Земля, на ней же терпеливое тело твое мудре лежит, божественне освятися. Но даждь молитвами ти нам разрешение прегрешении, житию исправление Уаре, и всем неудобезным избавление.

Запев. Пресвятая Госпоже Богородице спаси нас.

Явлься Дево из Тебе Господь светлаго облака, египетския кумиры всяческой пагубе предаст. Множеством же страстотерпец сего сподоби, терпети подобящихся честная Его страдания.

Запев с поклоном. Преподобне отче Паисие Великии, моли Бога о нас.

Скорый помощник был еси преподобне, еще в жизни сей, иногда у преподобнаго старца ученику в преслушании умершу, и ведену во ад, он же припадаше прося, да умолиши Всещедраго о ученице его, ты же яко скорый послушник и любви хранитель, надежду возложи ко всещедрому Богу простреся на молитву, и Тои многомилостив и во обетех неложныи, волю к боящымся Его сотвори, и молитву твою услыша, изведе душу от ада. Того ради и аз недостоиный припадая молю тя отче Паисие, молитвами твоими избави мя муки и огня негасимаго.

Запев. Преподобне отче Паисие Великии, моли Бога о нас.

Бывша мя бесом смех, человеком уничижение, праведным рыдание, ангелом плачь, осквернение воздуху и земли и водам. Тело окалях и ум оскверних, паче слова деяньми. Аз враг Богу бых. Увы мне, согреших, молитвами преподобнаго Паисия прости мя.

Слава. Яко впадыи в разбоиники и уязвен, тако и аз впадох от многих грехов и уязвена ми есть душа. К кому прибегну повинный аз? Токмо к Тебе милосердному душам Врачу, приими молебника тепла преподобнаго Паисия, и молитвами его излей на мя великую Твою милость.

И ныне. Прегрешения мои умножишася, прещению и суду достоин Чистая, припадая зову Ти: прежде конца подаждь ми очищение и умиление, и нравом исправление.

Катавасия: Избави от бед рабы своя, святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон). Катавасия: Избави от муки вечныя усопшаго(их) раб(а) своего(их) (имя рек), преподобне отче Паисие Великии, яко вси по Бозе к тебе прибегаем, ты бо молиши о нас Христа Бога нашего (поклон).

Господи помилуй (трижды с поклонами).

Задостойник. Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси Заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси Пренепорочную Матерь Христа Бога нашего, Юже осени Дух Пресвятыи. (Поклон земной).

Святыи Боже, Святыи Крепкии, Святыи Безсмертныи помилуй нас. (Три раза с поклонами).

Слава Отцу и Сыну и Святому Духу, и ныне и присно и во веки веком, аминь.

Господи Исусе Христе, Сыне Божии, помилуй нас. Аминь.

Тропарь, глас 4-й

Ин Тропарь 4 гл.

Воиньством святых страстотерпец страждущих законне, зря онех, показал еси мужески крепость свою. И устремився на страсть волею, и умрети вожделе за Христа. Иже приял еси почесть победы твоего страдания Уаре, моли спастися душам нашим.

Тропарь, глас 2. Божественною любовию от юности распалаемь преподобне, вся красная, яже в мире возненавиде, Христа единаго возлюбил еси. Сего ради в пустыню вселися, идеже сподобися Божественнаго посещения, Его же неудобь зрети и ангельскима очима, паде поклонися; великии же Дародатель, яко Человеколюбец, рече к тебе: не ужасайся, возлюбленный Мой, дела твоя угодна Мне. Се даю тебе дар: о коем либо грешнике помолишися, отпустятся ему греси. Ты же в чистоте сердца твоего возгореся, прием воду и прикоснуся Неприкосновенному, умы нозе Его, и воду пив, даром чюдес обогатися: грешники от муки молитвою своею избавляти, болящия исцеляти, О! преподобне отче Паисие, и бесов от человек отгоняти, ибо от сих грешников первыи есмь аз. Молю тя, да умолиши, Иже тебе обетова, да даст ми время покаяния, и простит мое согрешение, яко Благии и Человеколюбец, да со всеми и аз воспою Ему: Аллилуия.

Слава.Кондак, глас 2-й. Житейских молв оставль, безмолвное житие возлюбил еси, Крестителю подобяся всеми образы, с ним же тя почитаем, отче отцем Паисие.

И ныне. Богородичен глас 2. Вся паче смысла, вся преславная Твоя Богородице таинства, чистотою запечатлена, и девством хранима, Мати разумеся неложна, Бога рождши Истиннаго, Того моли спастися душам нашим.

Господи помилуй 40 раз с тремя поклонами.

Слава, и ныне. Честнейшую Херувим и славнейшую воистину Серафим, без истления Бога Слова рождьшую сущую Богородицу Тя величаем (поклон). Господи помилуй (дважды с поклонами), Господи благослови (поклон).

Отпуст: Господи Исусе Христе, Сыне Божии, молитв ради пречистыя Твоея Матере, и преподобных и богоносных отец наших и святаго мученика Уара, и преподобного отца нашего Паисия Великаго, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.

Боже, милостив буди мне грешному (поклон).

Создавыи мя, Господи, и помилуй мя (поклон).

Без числа согреших, Господи, помилуй и прости мя грешнаго (поклон).

Достойно есть, яко воистину блажити Тя Богородице, присноблаженную и пренепорочную, и Матерь Бога нашего, честнейшую херувим, и славнейшую воистину серафим, без истления Бога, Слова рождьшую, сущую Богородицу Тя величаем(земной поклон).

Слава Отцу и Сыну и Святому Духу (поклон)

Иныне и присно и во веки веком, аминь (поклон).

Господи помилуй, Господи помилуй, Господи благослови (поклон).

Господи Исусе Христе Сыне Божии, молитв ради Пречистыя Твоея Матере, силою Честнаго и Животворящаго Креста, и святаго ангела моего хранителя, и всех ради святых, помилуй и спаси мя грешнаго, яко Благ и Человеколюбец, аминь (поклон земной, без крестнаго знамения).

Боже, милостив буди мне грешному (поклон).

Создавыи мя, Господи, и помилуй мя (поклон).

Без числа согреших, Господи, помилуй и прости мя грешнаго (поклон).